Basaldean proiektu berritzaileak edo proiektu pilotuak garatzeko lurzatiaren eskaera

Legez eratuta egotea, zerga-betebeharrak eta Gizarte Segurantzarekikoak beteta edukitzea, eta administrazio publikoarekin kontratatzeko debekua dakarten kasuetako batean ez egotea.

Elkarteek eta irabazi-asmorik gabeko entitateek Eusko Jaurlaritzaren Elkarteen Erregistro Nagusian izena emanda egon beharko dute, edo dagokion erregistro publikoan.

Baratze-jarduera bideragarrirako egoki den eta berehalakoan ustiatu ahal izateko prest dagoen inongo landa-lurren jabe ez izatea Arabako Lurralde Historikoaren barruan.

EJZn nekazaritza ustiapen gisa alta emanda egotea (hala badagokio), edo esleitzen denetik hilabeteko epean gehienez horretarako konpromiso hartzea; orobat, Euskadiko Nekazaritza eta Elikadura Ekologikoaren Kontseiluan (Ekolurra) alta emanda egotea.

Proiektua sustatzen duen taldeko kideetako batek, gutxienez, prestakuntza hau izan beharko du, eta zuzenean parte hartu beharko du proiektuaren garapenean:

• Nekazaritzako zein nekazaritzako elikagaietako ingeniaritza, edo antzekoak.

• Edo nekazaritza arloko Lanbide Heziketako erdi edo goi mailako prestakuntza zikloa: nekazaritza ekologikoko ekoizpena, nekazaritza eta abeltzaintzako ekoizpena, paisajismoa eta landa-ingurua.

• Edo nekazaritza ekologikoaren arloko profesional-ziurtagiria edukitzea, edo nekazaritza ekologikoaren edo bestelako nekazaritza iraunkorraren arloko prestakuntza-ikastaroak sektorean onetsitako erakunde edo entitateek emanak egin izana 250 ordu edo gehiagoko ikastaro bat nahiz ordu kopuru hori osatu arteko hainbat ikastaro.

Azken betekizun horren lekuan, aski izango da gutxienez 6 hilabeteko esperientzia egiaztatzea nekazaritza ekologikoan edo bestelako nekazaritza jasangarrian, edo urtebeteko esperientzia ohiko nekazaritzan, eta gutxienez 20 orduko prestakuntza-modulu bat egin izana ekoizpen ekologikora bihurtzeko, lehen kasuan, eta gutxienez 100 ordukoa, bigarrenean.